HALMASHAURI YA WILAYA YA MUHEZA YAPATA HATI SAFI

Posted on: June 25th, 2022

Halmashauri ya Wilaya ya Muheza imepata hati safi  katika kipindi cha miaka mitano mfululizo yaani hati inayoridhisha kwa  Mwaka wa fedha kuanzia Mwaka wa fedha 2016/2017 hadi 2020/2021 ambapo kati ya hoja 65 ilizokuwa nazo tayari hoja 21 zimehakikiwa na kufungwa ikiwa hoja 44 zilizobaki ziko katika hatua mbalimbali za utekelezaji.

Ameyasema hayo Mkaguzi wa ndani wa Halmashauri ya Wilaya ya Muheza Bi. Vumilia Saimanga wakati akiwasilisha taarifa ya Mdhibiti na Mkaguzi Mkuu wa hesabu za Serikali CAG katika kikao maalum cha baraza la madiwani kilichoketi na kujadili majibu ya hoja za ukaguzi tarehe 22/6/2022.

Matokeo hayo  ya upatikanaji wa hati inayoridhisha HATI SAFI  (unqualified opinion) yametokana na upatikanaji wa majibu sahihi ya hoja  yaliyotolewa na wataalamu wa idara na vitengo mbalimbali vilivyopo katika Halmashauri ya Wilaya ya Muheza yaliyopelekea kufungwa kwa hoja 21 za ukaguzi.