Idara ya Ardhi na Maliasili ni miongoni mwa Idara na Vitengo muhimu vinavyounda Halmashauri ya Wilaya ya Muheza. Idara hii inaongozwa na Mkuu wa Idara ya Ardhi na Maliasili, ambaye pia hufahamika kwa cheo cha Afisa Ardhi na Maliasili Wilaya. Idara hii imegawanyika katika sehemu kuu mbili kiutawala, Sehemu ya Ardhi na Sehemu ya Maliasili.
Sehemu ya Ardhi nayo imegawanyika katika sehemu ndogo zipatazo nne, ambazo ni hizi zifuatazo;
Sehemu ya Utawala na Usimamizi wa Ardhi,
Sehemu ya Upimaji na Ramani,
Sehemu ya Uthamini wa Ardhi na
Sehemu ya Mipango Miji na Vijiji.
Sehemu ya Maliasili nayo pia imegawanyika katika sehemu ndogo zipatazo nne, ambazo ni hizi zifuatazo;
Sehemu ya Uratibu na Usimamizi wa Ufugaji Nyuki
Sehemu ya Uratibu na Usimamizi wa Misitu,
Sehemu ya Uratibu na Usimamizi wa Utalii na
Sehemu ya Uratibu na Usimamizi wa Wanyama Pori.
1.2 MAJUKUMU YA IDARA YA ARDHI NA MALIASILI
Idara ya Ardhi na Maliasili inatekeleza majukumu makubwa yafuatayo katika shughuli zake za kila siku;
Kuratibu na kusimamia masuala yote yanayohusu ardhi ikiwa ni pamoja na viwanja vya matumizi mbalimbali pamoja na mashamba ya mazao ya aina mbalimbali.
Kuchora ramani na kupima maeneo mablimbali ya ardhi yenye kuhitaji kupimwa kwa ajili ya matumizi ya aina mbalimbali kama vile viwanja na mashamba.
Kufanya uthamini wa ardhi au maendelezo yaliyofanywa kwenye ardhi kwa lengo la kufanikisha malipo ya fidia ya ardhi au ya maendelezo yaliyofanywa kwenye ardhi pale inapotakiwa kufanya hivyo.
Kuratibu na kusimamia mpangilio mzuri wa ujenzi katika maeneo ya mijini na vijijini ili kuhakikisha kuwa ukuaji wa miji na vijiji unazingatia na kuheshimu matakwa ya kisheria, kiafya na kiusalama.
Kuratibu na kusimamia shughuli za Ufugaji Nyuki kwa lengo la kuboresha afya na hali ya kipato cha wananchi kwa ajili ya kuboresha maisha yao ya kila siku.
Kuratibu na kusimamia shughuli za uhifadhi na usimamizi wa mazingira, vyanzo vya maji na misitu, uvunaji na usafirishaji wa mazao ya misitu kwa lengo la kudhibiti uharibifu wa mazingira, vyanzo vya maji na misitu.
Kuratibu na kusimamia shughuli za utalii wa kimazingira katika maeneo mbalimbali yenye vivutio vya kimazingira, kiasili, kiutamaduni, kimila na desturi mbalimbali za wenyeji wa Wilaya ya Muheza.
Kuratibu na kusimamia shughuli za wanyama pori pale wanapojitokeza, hasa wale waharibifu wa mazao ya wakulima mashambani katika maeneo mbalimbali ya Wilaya ya Muheza.
1.3 HALI YA WATUMISHI WA IDARA YA ARDHI NA MALIASILI
Idara ya Ardhi na Maliasili ina jumla ya watumishi nane (8) kwa sasa, Sehemu ya Ardhi ina jumla ya watumishi watano (5) na Sehemu ya Maliasili ina jumla ya watumishi watatu (3).
