HALMASHAURI YA WILAYA MUHEZA YAPONGEZWA

Posted on: October 24th, 2019

Naibu Waziri Wizara ya Ardhi, Nyumba na Maendeleo ya Makazi Mhe, Angelina Mabula ameipongeza Halmashauri ya Wilaya ya Muheza kwa kutekeleza maagizo mbalimbali ya Serikali jana tarehe 23/10/2019 alipofanya Ziara ya kikazi wilayani humo. Akizungumza na baadhi ya viongozi wa Wilaya Muheza na watumishi wa Idara ya Ardhi Mabula amesema amefurahishwa na utekelezaji wa maagizo aliyowaachia.

Awali Naibu Waziri alitoa maagizo ya kufanya marekebisho katika uhifadhi wa nyaraka kwenye Masijala ya Ardhi, pia alitoa agizo la kuweka Mtumishi wa Masijala na kumpatia mafunzo. Isa Msumari anayekaimu ukuu wa idara ya Ardhi amesema “Mheshimiwa Naibu Waziri tumetekeleza maagizo uliyokuwa umeyaacha kuweka folio namba kwenye faili, translada, minute sheet na nyaraka katika mpangilio mzuri ikiwa ni pamoja na kushikwaa na green tag. Pia tumetekeleza kuweka Mtumishi wa Masijala na kumpatia mafunzo Mtumishi huyo ni Bi. Regina Alpha Mayungu”.

Kadhalika Mheshimiwa Angelina Mabula amewasisitiza kufanya maandalizi ya maeneo ya uwekezaji pia ameomba upimaji wa maeneo yote ya umma uendelee ili tuweze kuondoa migogoro ya Ardhi Mheshimiwa Angelina Mabula  alipokuwa akizungumza na idara ya Ardhi ameikumbusha Halmashauri  kulipa fedha za National Housing  wanazodaiwa kwa wakati ili Miradi ya ujenzi iendelee kwa wakati.

Pia Naibu Waziri alipata nafasi ya kutembelea Mradi wa ujezi wa Ofisi za Ardhi akiongozwa na mwenyeji wake Mheshimiwa Mwanasha Tumbo Mkuu wa Wilaya Muheza, ambapo ujenzi upo katika hatua ya kumwaga jamvi. Naibu Waziri amemuomba Mkandarasi Amani Baraka kuagiza mchanga wakutosha ili shughuli za Ujenzi zisisimame hii ni kutokana na mvua zinazoendelea kunyesha.