UCHAGUZI MKUU WA RAIS, WABUNGE NA MADIWANI KUFANYIKA OKTOBA 28 2020

Uchaguzi Mkuu wa Rais, Wabunge na Madiwani wa Mwaka 2020 utafanyika siku ya jumatano tarehe 28 Oktoba, 2020. Vituo vilivyotumika kuandikishia wapiga kura ndivyo vitakavyotumika kupigia kura.

Vituo vya kupigia kura vitafunguliwa saa 1:00 asubuhi na kufungwa saa 10:00 jioni, sambamba na hayo umebandikwa mfano wa karatasi ya kupigia kura wenye picha ya  kila Mgombea na nembo ya chama chake.

Aidha orodha ya majina ya wapiga kura kwa kila kituo imebandikwa vituoni hivyo basi kila mwananchi anapaswa kwenda kwenye kituo alichojiandikishia kuhakiki jina lake na kuona Mfano wa karatasi ya Kupigia kura.

MAMBO YA KUZINGATIA WAKATI WA KUPIGA KURA/ SIKU YA UCHAGUZI

• Mpiga kura afike kituo cha kupigia kura na kadi yake ya mpiga kura.
• Mpiga kura aliyepoteza kadi yake anaruhusiwa kutumia kitambulisho mbadala kama vile Kitambulisho cha Taifa (NIDA), Pasi ya kusafiria, na Leseni ya udereva akiwa kwenye kituo alichojiandikishia tu, Kwa masharti kuwa majina yake yafanane nay ale yaliyopo kwenye daftari la kudumu la wapiga kura.
• Mpiga kura anapaswa kuweka Kura ya Rais kwenye Sanduku lenye Mfuniko wa Bluu, Sanduku la mfuniko Mweusi kura ya Mbunge na Kura ya Diwani iwekwe kwenye sanduku lenye Mfuniko Mweupe.
• Wapiga kura wasioona wapewe jalada ya nukta nundu(tactile ballot folder).
• Wapiga kura wenye ulemavu wa miguu, Msimamizi wa kituo ahakikishe anakigeuza kituturi juu chini kukifanya kituturi hicho kuwa kifupi ili kuwawezesha wapiga kura wenye ulemavu wa miguu kupiga kura kwa urahisi.
• Kipaumbele kitolewe kwa wapiga kura wenye ulemavu, wagonjwa wajawazito, Wazee na akina mama wanaonyonyesha na  waliokuja na watoto vituoni ili waweze kupiga kura mapema.
• Msimamizi wa kituo ahakikishe kuwa wapiga kura wote wamejipanga katika mistari miwili, yaani mstari wa wanawake na wa wanaume.
• Iwapo mpiga kura atakuwa na ulemavu utakaomsababisha ashindwe kupiga kura au hajui kusoma atamteua mtu yeyote anaemwamini amsaidie kupiga kura.
• ANGALIZO:  Mpiga kura ambaye hayumo katika Daftari la kudumu la wapiga kura, hata kama anayo kadi ya mpiga kura inayoonyesha kuwa ni mpiga kura wa kituo hicho hataruhusiwa kupiga kura.