WANANCHI WILAYANI MUHEZA WAKUSANYIKA KUMUOMBEA HAYATI DKT JOHN MAGUFULI

Posted on: March 27th, 2021

Wananchi wa Wilaya Muheza wakishirikiana na kamatiya AMANI ya wilaya hiyo leo tarehe 26/3/2021 katika Uwanja wa Jitegemee wamekutana  kuliombea  aliyekuwa Rais wa Jamhuri ya Muungano wa Tanzania Hayati DKT JOHN POMBE MAGUFULI ili mwenyezi mungu aipumzishe roho yake vyema.

Katika maombi yao walieleza namna rais Magufuli alivyokuwa akipambana kuhakikisha fedha za wananchi zinazokusanywa zinawaletea maendeleao kwa kuwajengea madaraja, miradi ya maji, hospitali ,barabara kwani aliamini ipo siku ataulizwa amewafanyia nini wananchi.

Waliendelea kuwa Mhe Magufuli alkuwa ni mtatuzi wa migogoro yaa ardhi ambapo kwa Halmashauri ya Wilaya Muheza Mnamo mwaka 2016 aliweza kuyafutia hati mashamba 6 ya Mkonge na kutaka yagawiwe kwa wananchi wanyonge, wananchi masikini.

Kwa upande wake Mkuu wa Wilaya Mhe. Mwanasha Tumbo amewasihi wananchi kushikamana bila ubaguzi wa dini kabila, rangi , tofutti za kisiasa ili kuweza kulinda amani na utulivu tuliyojaliwa katika nchi yetu.

Mkuu huyo wa Wilaya amewataka wananchi kuendelea kumuombea Rais Samia Suluhu Hassan ili aweze kusimama imara wakati akitekeleza majukumu yake bila kuyumbishwa na mtu yeyote Yule.

Nae Mwakilishi wa Mwenyekiti wa Chama cha Mapinduzi ambaye ni Diwani kata ya Masuguru MOHAMMED BAGHOZAH amesema chama cha mapinduzi kimemuamini Mama Samia kwa kuwa ni mchapakazi na shupavu hivyo wananchi waendelee kumuamini atafanya maendeleo kwa kufuata nyendo za hayati MAGUFULI.

Nao viongozi wa dini wamesema tuendelee kumuombea hayati MAGUFULI kwa mema aliyofanya na tumuunge mkono mama Samia aweze kuongoza vyema.